ეს ორი დღეა, რაც საკმაოდ სერიოზული პროტესტი აგორდა 1 არხის მიმართ, რისი მიზეზიც ისაა, რომ საზოგადოებრივი მაუწყებელი კამერუნი-საქართველოს ეროვნული ნაკრებების მატჩის პირდაპირ ტრანსლაციას არ გეგმავს. ამ პროტესტს საკმაოდ კარგი ბიძგი მისცა ჩვენ საიტზე გამოქვეყნებულმა სტატიამ ”ანელიას სახე” კამერუნი-საქართველოს მატჩის დროს (აი, ასე უყვართ ფეხბურთი ჩვენთან), რომელმაც საიტის TOP ნახვებში პირველი ადგილი დაიკავა. ქართველი გულშემატკივრების პროტესტს უერთდება ჩვენი საიტიც. 1 არხის საიტის ფორუმზე გაკეთდა თემა ”კამერუნი-საქართველო”, სადაც კორექტულ ფორმებში შეგიძლიათ გამოხატოთ თქვენი აზრი, ლინკზე - http://1tv.ge/Forum-View.aspx?TID=27 გუშინ და დღეს ჩათებისა თუ კომენტარების საშუალებით ვაფიქსირებთ ჩვენ პროტესტს. ასევე ვაპირებთ დღეს, 22:00 სთ-ზე გადაცემა ”გოლში” დარეკვას და ჩვენი აზრის დაფიქსირებას პირველი არხის საზოგადოებრივი მოთხოვნის გაუთვალისწინებლობის შესახებ. კიდევ ერთი ფაქტი- გუშინ, ღამით 1 არხის საიტზე პირადად მე გავაკეთე დღიური, სადაც გადავაკოპირე ზემოთ აღნიშნული სტატია. დღეს კი ვნახეთ, რომ ეს სტატია ამოღებულია საიტიდან. ჩვენ მეორედ ისევ დავამატეთ აღნიშნული სტატია დღეს, თუმცა რამდენიმე საათში ისიც გააქრეს, სამაგიეროდ მინიმუმ 2 დღიურია შექმნილი სერიალებზე (”ანელიას სახე”). სტატია არ შეიცავს არაკორექტულ სიტყვებს. მასში უბრალოდ გამოხატულია ქართველი გულშემატკივრების გულისტკივილი და პროტესტი. დღიურის წაშლის მიზეზი ჯერჯერობით უცნობია.
