ლევან კობიაშვილი "ჰერტაში" რჩება. ამის შესახებ
ქართველმა ფეხბურთელმა რუსულ გამოცემა "СЭ"-სთან ისაუბრა. გერმანიის
ჩემპიონატში კობიაშვილმა 305 მატჩი ჩაატარა, აქედან 121 - "ფრაიბურგის",
168 - "შალკეს", ხოლო 16 ბერლინელთა შემადგენლობაში.
- ვრჩები "ჰერტაში", თუმცა შემოთავაზება მქონდა მოსკოვის"დინამოდან",
შაბათს ჩავედი კიდეც მოსკოვში, "ალანიასთან" შეხვედრას დავესწარი, მქონდა
მოლაპარაკებები კლუბის ხელმძღვანელობასთან, ვნახე გუნდის ვარჯიშიც ბაზაზე .
- როგორი შთაბეჭდილება დაგრჩათ?
- მოსკოვში დიდი ხანია არ ვყოფილვარ, ძალიან კარგი პირობებია,
შემთხვევითი არ არის, რომ კევინ კურანი "დინამოში" თამაშობს.
- თქვენ რატომ არ დათანხმდით "დინამოს" შემოთავაზებას?
- გარდა ფეხბურთისა, ცხოვრებაში არსებობს სხვა მნიშვნელოვანი რამეებიც.
გერმანიაში 1997 წლიდან ვარ, ოჯახი მიეჩვია იქ ცხოვრებას, ბავშვები სკოლაში
დადიან. ორშაბათს "ჰერტასთან" 3-წლიან კონტრაქტს მოვაწერე ხელი.
- გერმანიაში დიდი პატივისცემით სარგებლობთ, სადაც თამაშობდით
ყველგან "მისტერ იმედისმომცემს" გიწოდებდნენ. ახლა გერმანიის მეორე
ბუნდესლიგაში ისაპარეზებთ...
- ასეც ხდება... ოჯახი ჩემთვის ყველაზე მთავარია. რა თქმა უნდა, ძალიან
მიხარია, რომ "დინამო" ჩემით დაინტერესდა. შემიძლია ვთქვა, რომ მოსკოვური
გუნდის ხელმძღანელობამ ყველაფერი გააკეთა, რომ გადავსულიყავი იქ სათამაშოდ.
დაბეჯითებით შემიძლია გითხრათ, რომ რუსეთის ჩემპიონატი გაცილებით მაღალი
დონისაა, ვიდრე გერმანიის მეორე ბუნდესლიგა. ვიმედოვნებ, რომ "ჰერტა"
ახალი მწვრთნელის - მარკუს ბაბელის ხელმძღვანელობით კვლავ დაბრუნდება
ბუნდესლიგაში.
- კურანისთან ერთად "შალკეში" არაერთი სეზონი ჩაგიტარებიათ, შეხვდით
მას მოსკოვში?
- დიახ, ვნახე "ალანიასთან" შეხვედრის დროს. მას და ვორონინს
მატჩის შემდეგ დიდხანს ველაპარაკე.
მირანდა სურმანიძე
goli.ge