მოსკოვის ”ცსკას” დუბლებმა, სადაც ქართველი ფეხბურთელი ნიკა ძალამიზე თამაშობს, დღეს მორიგი შეხვედრა გამართეს ყაზანში ადგილობრივი ”რუბინის” წინააღმდეგ. შეხვედრა მასპინძელთა გამარჯვებით, ანგარიშით 3:2 დასრულდა. 

ქართველი ფეხბურთელი მინდორზე ძირითად შემადგენლობაში იყო და 45-ე წუთზე ჩეხ ფორვარდ ტომაშ ნეციდს საგოლეც უპასა. ეს ნიკას პირველი საგოლე გადაცემაა მიმდინარე გათამაშებაში. მის აქტივშია ასევე 2 გოლი. ქართველმა ფეხბურთელმა მოედანი 81-ე წუთზე დატოვა. 

მორიგი ტური შედგა რუსეთის პირველი ლიგის გათამაშებაშიც. სასიხარულოა, რომ გოლის გატანა მოახერხა ოთარ მარცვალაძემ, რომელმაც თავი 29-ე წუთზე ”კამაზი”-”ვოლგას” შეხვედრაში გამოიჩინა და ანგარიში გაათანაბრა. ქართველი ფორვარდისათვის ეს მესამე გატანილი გოლია მიმდინარე გათამაშებაში. ძირითადში ასევე იყო და 90 წუთი გაისარჯა ედიკ საჯაიაც. შეხვედრა ფრედ, 1:1 დასრულდა. ”ვოლგას”, რომლის მთავარ მწვრთნელად რამდენიმე დღის წინ ომარ თეთრაძე დაინიშნა , 9 ტურის შემდეგ 10 ქულა აქვს.

championat.ge