შოთა არველაძის ავტობიოგრაფიული წიგნი „გუშინ" - პრეზენტაცია ახლახან ჰააგაში, საქართველოს საელჩოშიც გაიმართა.
წიგნის პირველი პრეზენტაცია შარშან, 28 დეკემბერს მოეწყო თბილისში. შოთა არველაძემ ამსტერდამის „აიქსში" ოთხი წელი (1997-2001) ითამაშა, ორი სეზონიც „ალკმაარში" (2005-07), ახლაც „ალკმაარში" მუშაობს მწვრთნელად და რა თქმა უნდა, მისი ავტობიოგრაფიული წიგნის პრეზენტაცია ამ ქვეყანაშიც უპრიანი იყო.
ღონისძიება ჰოლანდიაში საქართველოს ელჩის, მაია ფანჯიკიძის თაოსნობით ჩატარდა. პრეზენტაციაზე დაახლოებით ორმოცდაათი სტუმარი მივიდა. გამოჩენილი კომპოზიტორი გია ყანჩელი, ცნობილი ჟურნალისტი დავით კაკაბაძე - ისინი შესაბამისად ანტვერპენიდან და პრაღადან ჩავიდნენ ჰააგაში. პრეზენტაციას დაესწრო NATO-ში საქართველოს წარმომადგენელი გეგა მგალობლიშვილიც.
მოგეხსენებათ, წიგნის ტირაჟიდან შემოსული თანხა მთლიანად „ფონდი არველაძის" ქველ საქმეებს მოხმარდება და „გუშინ" ჰააგაში გამართულ პრეზენტაციაზეც იყიდებოდა. რა თქმა უნდა, შოთას არც ამჯერად დაზარებია ავტოგრაფების დარიგება...