საქართველოს 19-წლამდელთა ნაკრები 11 ოქტომბრიდან ევროპის ჩემპიონატის საკვალიფიკაციო ეტაპზე იასპარეზებს. ვლადიმერ გუცაევის გუნდის მეტოქეები პორტუგალიის, საბერძნეთისა და აზერბაიჯანის ჭაბუკთა ნაკრებები არიან. ჩვენი ჯგუფის მატჩებს კი პორტუგალია უმასპინძლებს. საკვბალიფიკაციო ეტაპისთვის გუცაევმა შემადგენლობა უკვე დაასახელა. 19-წლამდელთა ნაკრების შემადგენლობა ასეთია:

მეკარეები - მამუკა ნადირაძე (დინამო), დავით ლეგაშვილი (ნორჩი დინამოელი);

მცველები - მამუკა კობახიძე (ზესტაფონი), საბა კვირკველია (ზენიტი 2, რუსეთი), ავთანდილ ბრაჭული (რუბინი 2, რუსეთი), ბაქარ მირცხულავა (ბენფიკა 2, პორტუგალია), ნიკა კვეკვესკირი, ნიკა აფაქიძე (ორივე ბაია), მინდია ფუტკარაძე (ადელი), ირაკლი ხუჭუა (გაგრა);

ნახევარმცველები - ჯანო ანანიძე (სპარტაკი მოსკოვი, რუსეთი), თორნიკე ოქრიაშვილი (შახტარი 2, უკრაინა), გიორგი ჩელებაძე (ჩერნომორეცი, უკრაინა), ნიკა ძალამიძე (ცსკა მ, რუსეთი), ლევან ელიზბარაშვილი (ნორჩი დინამოელი), ზვიად სიხარულია (ბაია);

თავდამსხმელები - გიორგი ჭანტურია (ვიტესი, ჰოლანდია), ლაშა ჩაფიძე (უკლუბოდ).

როგორც ხედავთ გუცაევის სიაშია ეროვნულ ნაკრებში გამოძახებული ორი ფეხბურთელი - მოსკოვის "სპარტაკის" ნახევარმცველი ჯანო ანანიძე და ზუგდიდის "ბაიას" მცველი ნიკა კვეკვესკირი. ჩვენი ინფორმაციით მალტასთან მატჩის შემდეგ, ეროვნულის თავკაცი თემურ ქეცბაია კვეკვესკირს 19-წლამდელთა ნაკრებს დაუთმობს. ჯანო ანანიძეს კი ალბათ ლატვიასთან მატჩის შემდეგ შეუერთდება გუნდს. 19-წლამდელებს საკვალიფიკაციო ეტაპის მატჩები 11, 13 და 16 ოქტომბერს აქვთ. შესაბამისად, ანანიძე ალბათ მხოლოდ ბოლო შეხვედრაში შეეშველება ჭაბუკთა ნაკრებს.

პორტუგალიაში გამგზავრებამდე 19-წლამდელები თბილისში ერთ საკონტროლო მატჩს გამართავენ, გუცაევის გუნდი ხვალ 6 ოქტომბერს "გაგრას" გაეჯიბრება. გაცნობებთ იმასაც, რომ ზემოთ ჩამოთვლილი 18 ფეხბურთელის გარდა, გუცაევს 4 ფეხბურთელი სათადარიგოდ ჰყავს შეგულებული და თუ ისე მოხდა რომ რომელიმე ფეხბურთელი დაშავდა, მაშინ მას სათადარიგო კვარტეტიდან ერთ-ერთი ჩაანაცვლებს. ეს კვარტეტი ასე გამოიყურება: აზრიაშვილი (ავაზა-ვისოლი), დეკანოიძე (სპარტაკი ცხინვალი), უგულავა (ოლიმპი), კემუხტაშვილი (ტორპედო).


ყოველდღიური სპორტული გაზეთი
"ლელო"