2011 წლის 29 იანვარს საფეხბურთო კლუბმა ”ზესტაფონმა” ესპანური შეკრების პირველი ამხანაგური მატჩი გამართა. ზესტაფონელთა მეტოქე პოლონური ფეხბურთს ერთ-ერთი მოწინავე კლუბი, ქვეყნის მოქმედი ჩემპიონი, ქალაქ პოზნანის საფეხბურთო კლუბი ”ლეხი” გახლდათ.
გუშინდელ შეხვედრაში ზესტაფონელთა მეტოქე პოლონეთის 6-გზის ჩემპიონი, თასის 5-გზის და ქვეყნის სუპერთასის 4-გზის მფლობელი, პოზნანის საფეხბურთო კლუბი ”ლეხი” გახლდათ.პოლონეთის მოქმედი ჩემპიონი უეფას ”ევროპის ლიგაშიც” წარმატებით ასპარეზობს და მიმდინარე გათამაშების მიღმა ტურინის ”იუვენტუსის” დატოვებაც მოასწრო. საინტერესოა, რომ გუნდს წარსულში სან-სებასტიანის ”რეალ-სოსიედადის”, ”ბარსელონასა” და ესპანეთის ნაკრების ფეხბურთელი ხოსე მარი ბაკერო წვრთნის. გუნდის ღირსებას პოლონეთის, ლატვიის, სერბეთისა და ბელორუსის ნაკრებთა მრავალი ფეხბურთელი იცავს.
ჯანმრთელობის მდგომარეობასთან დაკავშირებული მცირე პრობლემების გამო დღევანდელ შეხვედრაში მონაწილეობის მიღება ვერ შეძლეს ნიკოლოზ გელაშვილმა, გიორგი ხიდეშელმა და ზურაბ მენთეშაშვილმა. სამაგიეროდ, სასტარტო შემადგენლობაში ვიხილეთ ”ახალი სახე” - 20 წლის ბრაზილიელი მცველი ვინიციუს ლოპეს ლაურინდო. თუმცა, უნდა ითქვას, რომ ეს უკანასკნელიც მალევე გახდა შესაცვლელი. პირველი ტაიმის მიწურულს შესაცვლელი მურთაზ დაუშვილიც გახდა, ბუბას ერთ-ერთი ორთაბრძოლას ფეხი გადაუბრუნდა, თუმცა აქვე უნდა ითქვას ისიც, რომ საფეხბურთო კლუბ ”ზესტაფონისა” და საქართველოს ეროვნული ნაკრების ნახევარმცველის ტრავმა სერიოზული არ გამოდგა.
პოლონეთის ჩემპიონი ქართველებს შერეული შემადგენლობით დაუპირისპირდა, ასევე ექსპერიმენტალური შემადგენლობით გავიდნენ მოედანზე ზესტაფონელებიც. პირველივე წუთებიდან მოყოლებული მოედანზე საინტერესო და გახსნილი პაექრობა გაჩაღდა. შედარებით თანაბარი საწყისი წუთების შემდეგ, უპირატესობას თანდათანობით ქართველები დაეუფლნენ და პოლონელთა მეკარე კჟიშტოფ კოტოროვსკის კართან ერთმანეთის მიყოლებით რამდენიმე სახიფათო მომენტი შეიქმნა - თავის გამოჩენა რატი წინამძღვრიშვილს, გოგი ფიფიასა და ჯაბა დვალს შეეძლოთ, თუმცა 33-ე წუთამდე იმერელთა ყველა მცდელობა უშედეგო გახლდათ. კარგა ხნის მომწიფებული 33-ე წუთზე გავიდა - თორნიკე გორგიაშვილის ბრწყინვალე გადაცემის შემდეგ რატი წინამძღვრიშვილიპოლონელთა საჯარიმოში შეიჭრა, სლავთა გოლკიპერი და მცველები ცრუმოძრაობით ”უსაქმოდ” დატოვა და თავის გუნდი დააწინაურა. ქართველთათვის სამწუხაროდ, პოლონელთა პირველივე საპასუხო ”აქცია” შედეგიანი აღმოჩნდა - შეტევის მარჯვენა ფლანგიდანიაკუბ ვილკის ჩამოწოდებულს ”ლეხის” სერბმა ლეგიონერმა ვოიო უბიპარიპმათავი შეაგება და როინ კვასხვაძის კარი დალაშქრა.
მეორე ტაიმის დასაწყისში გარკვეულ სათამაშო უპირატესობას უკვე პოლონელი ფეხბურთელები დაეუფლნენ, მათ ზედიზედ რამდენიმე სახიფათო მომენტი შექმნეს ზესტაფონელთა კართან და 61-ე წუთზე დაწინაურებაც შეეძლოთ, შეცვლაზე ძალიან აქტიურად შესული არტიომს რუდნევსის წაქცევისათვის დანიშნულ 11-მეტრიანს თავად დაზარელებული ასრულებდა, თუმცა იტალიური ”იუვენტუსის” გოლკიპერ ალექს მანინგერის 4-ჯერ დამმწუხრებელ ლატვიელს ზურაბ მამალაძის კარის აღება დღეს არ ეწერა. პოლონელთა მიერ გამოუყენებელი პენალტის შემდეგ თამაში გათანაბრდა და ორმხრივ იერიშებში წარიმართა. სლავებმა 76-ე წუთზე მაინც მოახერხეს დაწინაურება - არტიომს რუდნევსის ზესტაფონელთა საჯარიმოში ჩაწოდებულს ტომაშ მიკოლაიჩაკი საგოლედ ”გამოეხმაურა”.
. ქართველმა ფეხბურთელებმა, რომელთა გეგმებში მარცხი არანაირად არ შედიოდა, მატჩის დასკვნითი წუთები შეტევებში გაატარეს. 89-ე წუთზე. ალექსბენაშვილის მარჯვნიდან ჩაწოდების შემდეგ, პოლონელთა კართან ძალიან სახიფათო მომენტი შეიქმნა, თუმცა ნიკოლოზ ჩიხლაძის დარტყმა ოდნავ არაზუსტი გამოდგა. ანგარიშის გაყაიმების რეალური შანსის ხელიდან გაშვების შემდეგ, შეხვედრაც თითქოს ასე უნდა დასრულებულიყო, თუმცა, მარგველთა სასახელოდ უნდა ითქვას, რომ მათ ბოლომდე იბრძოლეს და მატჩის ესპანელი არბიტრის კარავაკას მიერ კომპენსირებულ პირველ წუთზე, ალექს ბენაშვილის კიდევ ერთი გააზრებული გადაცემის შემდეგ, ირაკლი ძარიამ ანგარიშის გათანაბრება მოახერხა - 2-2.
შემდეგ მატჩს ქართული გუნდი 2 თებერვალს გამართავს. ”მარბელიას თასის” გათამაშების სასტარტო შეხვედრაში ზესტაფონელები პრაღის ”სპარტას” დაუპირისპირდებიან. მატჩი ადგილობრივი დროით 16:00 საათზე (თბილისის დროით 19:00 საათზე) დაიწყება. ...
