სერბული "ვოივოდინას" მაისურით პირველი ოფიციალური მატჩი გამართა გიორგი მერებაშვილმა. ქართველი ფეხბურთელის გუნდმა ჰაიდუკის "კულას" უმასპინძლა და 3:2 დაამარცხა. ქართველი შემტევი ამ მატჩში საგოლე პასით გამოირჩა, მაშინ როცა მისი გუნდი 1:2 აგებდა. "მერება" 80 წუთზე შეცვალეს. "ვოივოდინა"16 ტურის შემდეგ დაგროვებული 27 ქულით მესამე ადგილზეა.

 ქართველებით დახუნძლული "დიორ ეტო" უნგრეთის ჩემპიონატის მორიგ ტურში "უიპეშტს" ესტუმრა და მეტოქე 3:0 დაამარცხა. ეს შეხვედრა მეტად მნიშვნელოვანი იყო ქართველთა გუნდისთვის, რადგანაც ევროსაგზურისთვის ბრძოლაში "უიპეშტი" დიორელთა მთავარი მეტოქეა. ამ მოგების წყალობით "დიორ ეტოომ" 29 ქულა დააგროვა და  "უიპეშტს" გაუთანაბდა. ქართველთა გუნდი 16 ტურის თავზე მე-3 ადგილზეა. რაც შეეხება ქართველთა თამაშს, ალექსიძე ძირითად შემადგენლობაში იმყოფებოდა და 90-ე წუთზე ანგარიში 3:0 გახადა. ლაშა თოთაძე სათადარიგო იყო და მოედანზე 88-ე წუთზე შევიდა. დანარჩენი ქართველები განაცხადს მიღმა დარჩნენ.

 ინგლისის ჩემპიონშიპის მორიგ ტურში ზურაბ ხიზანიშვილის "რედინგმა", საშინაო მატჩში გამანადგურებელი ანგარიშით 5:0 დაამარცხა "შეფილ უენსდი". ქართველმა მცველმა შეხვედრა შეუცვლელად ჩაატარა.

 გერმანიის ბუნდესლიგის 24-ე ტურში, "ჰოფენჰაიმთან" საშინაო მატჩში 0:2 დამარცხდა ლევან კობიაშვილის "ჰერტა". ქართველმა ფეხბურთელმა შეუცვლელად ითამაშა. "ჰერტა" 15 ქულით კვლავ ბოლო ადგილზეა.

 "აეკთან" საგარეო მატჩში 1:0 დამარცხდა გიორგი შაშიაშვილის "ერგოტელისი".  ქართველმა მცველმა მინდორზე 90 წუთი გაატარა.

 ზამთრის პაუზის შემდეგ განახლდა უკრაინის ჩემპიონატი. სანდრო კობახიძის "კრივბასი", კიევის "დინამოს" ესტუმრა და 1:0 დამარცხდა. ქართველი ფეხბურთელი ცენტრფორვარდად განამწესეს, 90 წუთის განმავლობაში იგი ბევრს სცდილობდა კიეველთა კარის აღებას, თუმცა ამაოდ.

 ლვოვის "კარპატმა", რომელშიც სანდრო გურული ირიცხება, ხარკოვის "მეტალისტს" უმასპინძლა და 2:1 დაამარცხა. ქართველი ფეხბურთელი მოედანზე 77-ე წუთზე შევიდა მაშინ როცა ანგარიში 2:1 იყო. "კარპატი" 17 თამაშში დაგროვებული 27 ქულით მე-6 ადგილზე იმყოფება.

 "ილიჩევეცის" მაისურით გიორგი გაბედავას დებიუტი შედგა. მისი გუნდი ზაპოროჟიეს "მეტალურგს" ესტუმრა, რომელშიც ირაკლი მოდებაძე ირიცხება და 2:0 დამარცხდა. ეს უკანასკნელი ტრავმის გამო  განაცხადში არ იმყოფებოდა. რაც შეეხება გაბედავას, იგი თამაშში 62-ე წუთზე ჩაერთო, როცა მისი გუნდი 2:0 აგებდა. "მეტალურგი" 18 ქულით მე-10 ადგილზე იმყოფება, "ილიჩევეცი" კი 18 ქულით მე-12-ზე.

გიორგი ქარქაშაძე    www.goli.ge