ხუთშაბათს ევროპის ლიგის განმეორებით მატჩში "ლივერპული" "ნაპოლის" მასპინძლობს. როგორც მოგეხსენებათ, ორი კვირის წინ ნეაპოლში სამი ლივერპულელი ფანი დაჭრეს. ჩხუბი ჯერ ქალაქის ქუჩებში დაიწყო. იტალიელები იარაღად დანებს, დამტვრეულ ბოთლებსა და ქვებს იყენებდნენ. გარდა ამისა, ნეაპოლელები ცეცხლსასროლი იარაღის მუქარით სასტუმროში ძარცვავდნენ ლივერპულელებს. იყო ბრიტანელებზე მკვლელობის მცდელობის შემთხვევებიც. მსგავსი ფაქტების თავიდან ასაცილებლად, ხუთშაბათს მერსისაიდის პოლიცია საგანგებო რეჟიმში იმუშავებს. მიუხედავად იმისა, რომ მატჩზე დასასწრებად "ენფილდზე" იტალიელებისთვის 2 600 ადგილია გამოყოფილი, ლივერპულში 7 000 ნეაპოლელი ქომაგის ჩასვლა მაინც იგეგმება. სტადიონზე გაიზრდება უსაფრთხოების ზომები. ხუთშაბათს მერსისაიდელი და იტალიელი პოლიციელები ერთობლივად იმუშავებენ არეულობის თავიდან ასარიდებლად. ჯონ ლენონის სახელობის ლივერპულის აეროპორტში შვიდი ჩარტერული რეისია დაგეგმილი. ნეაპოლელების ქალაქის ცენტრში და სტადიონზე ტრანსპორტირებისთვის არ იქნება გამოყოფილი ექსკორტი, თუმცა გამოცხადდება პოლიციის დამატებითი ძალების მობილიზება. როგორც ცნობილია, მატჩის ბილეთების იტალიელ მფლობელთა ვინაობა იდენტიფიცირებულია, რაც გამორიცხავს სტადიონზე სხვა პირთა შეღწევას."ხუთშაბათის მატჩში პოლიცია იქნება ისევე მობილიზებული, როგორც სხვა შეხვედრებში, რათა თავიდან ავიცილოთ ის, რაც მოხდა ნეაპოლში. ჯერ-ჯერობით შეშფოთების მიზეზი არ გვაქვს. მატჩის დღეს ბილეთები არ გაიყიდება, ამიტომ ვისაც თამაშზე დასწრება სურს, ადრე უნდა შეიძინოს. ჩვენ ძალიან სერიოზულად ვემზადებით და არ დავუშვებთ მასობრივ ინციდენტებს", განაცხადა მერსისაიდის პოლიციის უფროსმა დეივ ლიუისმა.

ბექა დოგრაშვილი