ნეაპოლელების თავდასხმა ლივერპულელებზე - ადმინის გამონაკლისი სტატიები - სტატიების კატალოგი

ნეაპოლში, ევროპის ლიგის გათამაშებაზე, "ნაპოლი"–"ლივერპულის" (0-0) მატჩში, ნაპოლიტანელმა ტიფოზებმა "ლივერპულის" ფანები სცემეს. ჩხუბი ჯერ ქალაქის ქუჩებში დაიწყო. იტალიელები იარაღად დანებს, დამტვრეულ ბოთლებსა და ქვებს იყენებდნენ. გარდა ამისა, ნეაპოლელები ცეცხლსასროლი იარაღის მუქარით სასტუმროში ძარცვავდნენ ლივერპულელებს. აგრეთვე იყო ბრიტანელებზე მკვლელობის მცდელობის შემთხვევებიც. ხულიგნები მიზანმიმართულად გამოვიდნენ ქუჩებში ინგლისელებზე "სანადიროდ". ძალადობის ფაქტები მატჩის დროსაც გაგრძელდა. შეხვედრის მიმდინარეობის პერიოდში, რამდენიმე ნეაპოლიტანელმა ტიფოზმა გაარღვია პოლიციის კორდონი, მოახერხა იმ ტრიბუნაზე გადასვლა, სადაც ინგლისელები ისხდნენ და სანამ ლივერპულელები გონს მოვიდოდნენ, მოასწრეს მათი გალახვა. სამი ინგლისელი ქომაგი ტრავმატულ მდგომარეობაშია, ათი ადამიანი დაჭრილია, პოლიციის ხუთმა ოფიცერმა მიიღო დაზიანება. დაშავებულები საავადმყოფოში გადიან მკურნალობის კურსს. მათგან თუნდაც ერთ მათგანს რაიმე სერიოზული დაზიანება რომ აღმოაჩნდეს, იტალიურ გუნდს სანქციები მოელის. როგორც ქალაქ რომის პრესა იტყობინება, პოლიციამ სამი ადგილობრივი ახალგაზრდა დააკავა. 4 ნოემბერს "ნაპოლის" განმეორებითი შეხვედრა "ენფილდზე" ექნება. ტიფოზებმა თუ ლივერპულში ჩასვლა გაბედეს, ძნელი წარმოსადგენი არ უნდა იყოს რა დღეც დაადგებათ. სხვადსხვა სპორტული ფორუმებიდან ჩანს, რომ ინგლისელები მათთან შესახვედრად უკვე ემზადებიან. საბედნიეროდ, ნეაპოლში არიან ცივილურად მოაზროვნე ადამიანებიც. ერთ-ერთ ვებ-საიტზე დარეგისტრირებული ნეაპოლელი ტიფოზი, სახელად ჯოვანი ამ სიტყვებით გამოეხმაურა აღნიშნულ ფაქტს: "მე "ნაპოლის" გულშემატკივარი ვარ, ნამდვილი გულშემატკივარი. ვფიქრობ, ამის ჩამდენი სულელია და მეტი არაფერი. როგორც ნეაპოლელი მოქალაქე, მრცხვენია ამ ყველაფრის გამო. მინდა იცოდეთ, რომ "ლივერპულს" ჰყავს მსოფლიოში ერთ-ერთი საუკეთესო ფანობა. "ნაპოლისა" და "ლივერპულს" აქამდე არასდროს ეთამაშათ და ჩვენ თითქმის ოცნებად გვქონდა ქცეული ლივერპულელ ქომაგებთან ერთად ლუდის დალევა და შარფების გაცვლა. ეს დიდი სირცხვილია. დიდი ბოდიში, მაგრამ მე ამ ფაქტის შეფასება სხვა სიტყვებით არ შემიძლია". ნეაპოლელი ქომაგები იტალიაში ყველაზე სასტიკები არიან და ეს კიდევ ერთხელ დაამტკიცეს. ბევრ მათგანს აქვს კავშირი მემარჯვენე პოლიტიკურ ჯგუფებსა და მაფიასთან. ბექა დოგრაშვილი
1 2 3 4 5 კატეგორია: ადმინის გამონაკლისი სტატიები \| დაამატა: Administrator (22.10.2010)
ნანახია: 1256 \| რეიტინგი: 0.0/0