`ვიტ ჯორჯიაში` გაზრდილმა გიორგი დათუნაიშვილმა, კარიერის
განავლობაში პირველად შეიცვალა გუნდი და ქუთაისის `ტორპედოში` გადაბარგდა
ყოფილ აღმზრდელთან – ნესტორ მუმლაძესთან. გუნდთან განშორების შემდეგ, ახალ
გუნდზე პირველი შთაბეჭდილებების გასაგებად, გიორგი დათუნაიშვილს
დავუკავრშირდით. საუბარი, რა თქმა უნდა, ყოფილი გუნდით დაიწყო:
- გიორგი, `ვიტ ჯორჯია` სულ მალე ევროტურნირზე ითამაშებს,
ევროპის ლიგის საკვალიფიკაციო გათამაშებას მეორე ეტაპიდან ჩაერთვება. 5
ფეხბურთელი წავიდა გუნდიდან, არცერთ თქვენგანს არ ჰქონდა სურვილი, ევროპა
მაინც ეთამაშა,ან კლუბის ხელმძღვანელობას არ ჰქონია ამის სურვილი?
- სურვილი კი მქონდა, მაგრამ არც `ტორპედოს` და არც `ვიტ ჯორჯიას` მასე
აღარ აწყობდა. დარჩენის სურვილი მქონდა, მაგრამ ტორპედომ ძალიან კარგი
პირობები შემომთავაზა. `ვიტ ჯორჯიას` ხელმძღვანელობასაც, გუნდის
გაახალგაზრდავება სურს.
- რა ადგილი უკავია შენს ცხოვრებაში უკვე ყოფილ გუნდს?
- ჩემი მეორე ოჯახია `ვიტ ჯორჯია`. იქ გავიზარდე და იქ დავიწყე
ფეხბურთის თამაში, გულის სიღრმეში მუდამ ვუგულშემატკივრებ მათ და ახლაც
წარმატებას ვუსურვებ. `ვიტ ჯორჯია` ყოველთვის ჩემს გულში დარჩება.
- გუნდი ხუთმა წამყვანმა ფეხბურთელმა დატოვა, ევროპაზე ამის გამო გუნდი ცუდ შედეგს ხომ არ აჩვენებს?
- `ვიტ ჯორჯიას ჰყავს` ახალგაზრდა ბიჭები, რომლებსაც შეუძლიათ თამაში,
ევროპაზე სათამაშო გამოცდილება ჯერ არ აქვთ და ამან შეიძლება გარკვეული
პრობლემა შექმნას, მაგრამ ანგარიშგასაწევ ძალად დარჩება ისევ ეს გუნდი.
- `ვიტ ჯორჯიას` წინააღმდეგ თამაში არ გაგიჭირდება?
- მოედანზე ყოველთვის მოსაგებად გავდივარ, ამიტომ ყოფილ გუნდთანაც მოსაგებად გავალ.
- `ტორპედომ` უკვე ვარჯიში დაიწყო. რა ხდება გუნდში, სამომავლო გეგმებზე ისაუბრეთ?
- ჯერ სამომავლო გეგმებზე საუბარი ნაადრევია, გუნდი ჩამოყალიბების
პროცესშია. ორჯერად ვარჯიშებზე გადავედით. ალბათ, იქნება შეკრებაც და
შემდეგ უკვე თამამად შეიძლება საუბარი სამომავლო გეგმებზე.
მინდა, შემთხვევით ვისარგებლო და თქვენი საშუალებით, მადლობა
გადავუხადო `ვიტ ჯორჯიას` პრეზიდენტს – გურამ რუხაძეს, მწვრთნელებს მერაბ
კოჭლაშვილსა და გელა გომელაურს. `ვიტ ჯორჯიას` ჩემს ცხოვრებაში
მნიშვნელოვანი ადგილი უკავია.
მაგდა კლდიაშვილი goli.ge
|