გუშინ გაიმართა საქართველოს ჩემპიონატის გადადებული პირველი ტური, რის
შემდეგაც ცხრილში არსებული ოთხხელისუფლებიანობა ორხელისუფლებიანობამ
ჩაანაცვლა.
ყველაზე გამოსარჩევი მოვლენა ტურში ზესტაფონელთა გამარჯვება იყო,
რომლებმაც ბოლოადგილოსან ქუთაისის "ტორპედოს" მოუგეს და რიონისპირელები
ისევ პირველი გამარჯვების მოლოდინში არიან. არადა, "ტორპედო" პირველი
ტაიმის შემდეგ თენგიზ ჩიკვილაძის გოლით იგებდა, მაგრამ ზესტაფონელთა
საყრდენმა ნახევარმცველმა მურთაზ დაუშვილმა ბოლო 20 წუთში მათი იმედები
დაასამარა.
დაუშვილი კი ცალკე თემაა. ამ ფეხბურთელის მოვალეობა მოედანზე მეტოქის
შეტევების ჩაშლაა, ახლა კი გუნდს მხსნელად მოევლინა. სავარაუდოდ, დაუშვილს
საქართველოს ნაკრების მწვრთნელი თემურ ქეცბაია მალტასთან სათამაშოდ
გამოიძახებს. ქეცბაიას ამის გაკეთება საბერძნეთ-ისრაელთან მატჩებისთვისაც
უნდოდა, მაგრამ ახალგაზრდული ნაკრების გათვალისწინებით თავი შეიკავა.
ისევ დუბლით გამოიჩინა თავი გიორგი მეგრელაძემ. ამჯერად, მისი გოლები
ზუგდიდის "ბაიას" მხოლოდ ქულის მოპოვებაში დაეხმარა. მოვლენები ამ მატჩშიც
საინტერესოდ განვითარდა - ბოლნისის "სიონი" 2:0 დაწინაურდა, მაგრამ
მეგრელაძემ ბოლო წამამდე არ ‘’მოისვენა’’ და ბომბარდირთა დავაშიც
დაწინაურდა.
"დინამომ" ისევ მოიგო - ამჯერად მინიმალური ანგარიშით და იმის გარდა
რომ თავად ბლომად ანიავა მომენტები, თავად გადაურჩა ფრეს. თბილისელთა
მოგება გააუფერულა რობერტინიოს ტრავმამ, რომელიც სრულიად უწყინარ
სიტუაციაში მიიღო და მოედნიდან სასწრაფო სამედიცინო მანქანით გახდა
წასაყვანი.
რუსთავის "ოლიმპმა" საკმაოდ დაძაბულ და ხისტ ბრძოლაში მოუგო "ვიტ
ჯორჯიას". მოუგო უფრო გამოცდილების ხარჯზე. "ვეტერინარებს" ვერც
თავდადებულმა ბრძოლამ უშველა - კლასმა თავისი სიტყვა თქვა. გოლები გიორგი
ქავთარაძემ და გიორგი ბერიაშვილმა გაიტანეს.
კვლავ გაგვაოცა ფოთის "კოლხეთმა", მაგრამ სამტრედიელებთან მათი
გამარჯვება სულაც არ იყო გასაკვირი. იმერლებს უფინანსობა აწუხებთ და
ფეხბურთის სათამაშოდ თითქოს არ სცალიათ. ამის მიუხედავად, ბოლომდე იბრძოლეს
და ცხვიტარიამ მათი წინააღმდეგობა მატჩის დამთავრებამდე მხოლოდ 15 წუთით
ადრე გატეხა.
goli.ge
|