"ლივერპულის" მწვრთნელი როი ჰოჯსონი მიესალმება კლუბის მფლობელის ჯონ ჰენრის დაპირებას, რომლის მიხედვითაც, ზამთრის სატრანსფერო პერიოდში კლუბის ვარსკვლავების გაყიდვა არ იგეგმება. გავრცელებული ინფორმაციის თანახმად, იანვარში ფერნანდო ტორესი და პეპე რეინა გუნდს დატოვებდნენ, თუმცა ჰენრი ამტკიცებს, რომ ის დაინტერესებულია გუნდის მხოლოდ გაძლიერებით. "პრეზიდენტმა ყველა დაგვამშვიდა, "კლუბის ვარსკვლავების გაყიდვა არ იგეგმება" - ამ სიტყვების მოსმენა ყველას გვინდოდა. ჭორები იმის შესახებ, რომ გუნდის ძირითადი მოთამაშეები ზამთარში გაიყიდებოდნენ სიმართლეს მოკლებული აღმოჩნდა. "ლივერპული" არის ფეხბურთელების მყიდველი და არა გასაყიდი გუნდი. ჩვენი მიზანია უფრო გავძლიერდეთ, ეს კი შესაძლებელია ძირითადი ბირთვის შენარჩუნებითა და ახალი ფეხბურთელების შეძენით. ვარჯიშზე რეინამ და ტორესმა აჩვენეს, რომ კარგად მომზადებულნი არიან. ეს ფეხბურთელები ახლა ისე გვჭირდება, როგორც არასდროს. ისინი დაგვეხმარებიან გუნდის მდგომარეობის გაუმჯობესებაში", განაცხადა ჰოჯსონმა. მთავარი მწვრთნელი აღიარებს, რომ მისი გუნდში მოსვლის დღიდანვე გავრცელდა მრავალი ჭორი და ყველანაირი მოქმედება აყვანილ იქნა ინტენსიური კონტროლის ქვეშ. "ჭორებმა შეიძლება გუნდს ზიანი მიაყენოს, თუმცა ეს დამოკიდებულია იმაზე, თუ როგორ გავუმკლავდებით მას. აქ არიან ფეხბურთელები, რომლებიც უკვე წლებია "ლივერპულისთვის" თამაშობენ. მათ ყოველ დღე ესმოდათ სისულელეები, ვგულისხმობ ჭორებს მათი გაყიდვის შესახებ, თუმცა ამ მოთამაშეებმა გადალახეს ყველანაირი ბარიერი და ისინი კვლავ ამაყად იცავენ "ლივერპულის" სახელს. ჩემთვის საინტერესო აღმოჩნდა სტივენ ჯერარდისა და ჯემიე კარაგერის აზროვნების მქონე ადამიანებთან შეხვედრა. აქამდე რაც მათზე მქონდა მოსმენილი, უკვე სამუშაო პროცესშიც ვნახე. მე ისინი თავიდანვე ჩავრთე ჩემთან ერთად მუშაობაში. იანვრისთვის მე ვერ მოგცემთ გაბედულ დაპირებეს, თუმცა უკვე დროა მოვნიშნოთ ფეხბურთელები, რომელთა ხელში ჩასაგდებადაც ვიბრძოლებთ. იშვიათია დღეები, როდესაც მე არ ვფიქრობ იმაზე, თუ რა პოზიციაზე და როგორი ტიპის ფეხბურთელები გვჭირდება. ჩვენი სკაუტინგი დიდ სამუშაოს აკეთებს, თუმცა მეც და გუნდის ხელმძღვანელობაც ვართ ჩართული ფეხბურთელების მოძიებაში. ჩვენ კვირაში რამდენიმე მატჩს ვუყურებთ და ვაკვირდებით ფეხბურთელებს. უკვე მონიშნული მყავს ობიექტები, რომლის ყიდვასაც იანვარში ვაპირებთ, თუმცა მანამდე ჯერ კიდევ ბევრს უნდა დავაკვირდეთ", აღნიშნა ჰოჯსონმა.

ბექა დოგრაშვილი

31  ოქტომბერი. 2010 წ.