2010
წლის 1 ივლისს საფეხბურთო კლუბმა ”ზესტაფონმა” გამართა 2010-2011 წლის
ევროპის ლიგის გათამაშების სასტარტო შეხვედრა. ტურნირის პირველი მატჩი
იმერელთათვის ძალიან წარმატებული გამოდგა - ქართველმა ფეხბურთელებმა
აპენინელი სტუმრები 5-0 გაანადგურეს ...
უეფას ევროპის ლიგის ახალი გათამაშების დაწყებასა და მატჩის მონაწილე გუნდებს მასპინძელთა 4 000 ქომაგი ოვაციით შეეგება.
პირველივე წუთებიდან მოყოლებული უპირატესობა ხელთ მასპინძლებმა იგდეს,
თუმცა სათამაშო უპირატესობის გატანილ გოლებში გარდასახვა იმერლებმა მხოლოდ
20-ე წუთზე მოახერხეს - ნიკოლოზ გელაშვილის წაქცევისათვის დანიშნული თერთმეტმეტრიანი საჯარიმო დარტყმა გოლად თავად დაზარალებულმა აქცია. გატანილი გოლის შემდეგ მასპინძლებმა ტემპს უმატეს და შემდეგ ოთხ წუთში კიდევ ორჯერ იხეირეს - 23-ე წუთზე ირაკლი ძარიას დროული გადაცემით ჯაბა დვალმა ისარგებლა, ხოლო 24-ეზე წინა ეპიზოდის გმირმა ასისტენტობა გაუწია ნიკოლოზ გელაშვილს, რომელმაც დუბლი აუღელვებლად გაიფორმა.
მეორე ტაიმის დასაწყისში მარგველთა უპირატესობა კიდევ უფრო შთამბეჭდავი ჯაბა დვალმა გახადა - 62-ე წუთზე ზესტაფონელებმა სწრაფი შეტევა წამოიწყეს, გოლის ავტორს საგოლე პასი ისევ ირაკლი ძარიამ გაუკეთა. 90-ე წუთზე კი საბოლოო წერტილი დღევანდელ შეხვედრას შეცვლაზე შემოსულმა თორნიკე გორგიაშვილმა დაუსვა, საგოლე პასი კი შოთა გრიგალაშვილმა მიითვალა. ზესტაფონელთა გამარჯვება დიდი ანგარიშით და უსერიოზულესი განაცხადი შემდეგ წრეში გასასვლელად - 5-0.
ევროპის ლიგის გათამაშების პირველი საკვალიფიკაციო ეტაპის ”ფაეტანოსთან” გასამართ განმეორებით შეხვედრას ”ზესტაფონი” სან მარინოში 8 ივლისს გამართავს...
საფეხბურთო კლუბ ”ზესტაფონის” პრეს-სამსახური
|