უკრაინულ შეკრებაზე მყოფმა 'ვიტ ჯორჯიამ' პირველი საკონტროლო მატჩი გამართა. ჩვენი გუნდის მეტოქე უკრაინის უმაღლესლიგელი სიმფეროპოლის 'ტავრია' იყო. შეხვედრა ევპატორიაში, უკრაინის ოლიმპიური ნაკრების ბაზაზე ჩატარდა, 'ვიტ ჯორჯია' 1:2 დამარცხდა.

 მატჩი გარდამავალი უპირატესობით წარიმართა, 'ვიტ ჯორჯია' რიგიანად გამოიყურებოდა. მე-2 წუთზე გიორგი ჯანელიძემ კუთხური მოაწოდა, ვახტანგ კვარაცხელიამ თავით დაუგდო ბურთი დავით ლომაის და 'ვიტ ჯორჯიაც' დაწინაურდა.

 'ტავრიამ' ანგარიში მე-11 წუთზე გაათანაბრა: პენალტი კოვპაკმა გამოიყენა.

 უნდა აღინიშნოს, რომ მსაჯობა ვერ იყო სანიმუშო, განსაკუთრებით პირველ ტაიმში, როცა არბიტრმა ჯერ გურამ ადამაძე გააძევა, მერე კი დავით მაისაშვილი. რადგან მატჩი ოფიციალური არ იყო, გაძევებული ფეხბურთელის შეცვლა ნებადართული გახლდათ.

 'ტავრიამ' მეორე გოლი 63-ე წუთზე გაიტანა, თავი კურილოვმა გამოიჩინა.

 საგოლე მომენტები 'ვიტ ჯორჯიასაც' ჰქონდა, ჯანელიძემ და ლომაიამ ბურთი ძელს გაარტყეს.

 'ვიტ ჯორჯია':    მიქაბერიძე - ხურცილავა (ჭანკვეტაძე 85), ლომაია, ადამაძე (კასრაძე 32), ბეჭვაია (ღანიაშვილი 77) - ვასაძე, მაისაშვილი (კორიფაძე 40, როსტიაშვილი 75), გურეშიძე (გოგიაშვილი 86) - ჯანელიძე (ბერიაშვილი 81), ლიპარტია (ზაქრაძე 80) - კვარაცხელია (ჩიმაკაძე 54).