რუსეთში ჩემპიონატი დასრულდა, უკრაინის პრემიერლიჰა კი ზამთრის ძილს მიეცა. ბუნებრივია, ჩვენი მიმოსახილველი ლეგიონიც მნიშვნელოვნად "შეთხელდა" და მოსაყოლიც ბევრი არაფერია.

შაბათ-კვირას იტალიაში ქართველს ბურთი არ გაუგორებია. უკვე გატყობინებდით, რომ კახა კალაძისთვის საფეხბურთო წელიწადი დასრულდა. ამიტომაც "ჯენოა" ქართველთა ნაკრების კაპიტნის გარეშე ეწვია "ლეჩეს". ლევან მჭედლიძეც არ იყო "ემპოლის" განაცხადში, რომელიც სტუმრად "ალბინოლეფესთან" დამარცხდა - 0:2. ლევანს ტრავმის გამო არ უთამაშია.

არ უთამაშია არც ზურაბ ხიზანიშვილს, თუმცა მიზეზი ამჯერად სულ სხვაა - "შეფილდ უენსდეის" მოედანი მოყინული იყო და "რედინგი" იქ სათამაშოდ აღარ ჩასულა. საფრანგეთში გიორგი მაკარიძის "ლე მანი" დღეს მასპინძლობს "ტრუას".

გახსოვთ ალბათ, ლევან ყენიას შესახებ ახალი ინფორმაციით რომ გაგახარეთ - ლევანი უკვე შეუდგა ვარჯიშს და იანვარში მოედანზეც ვიხილავთ, მანამდე კი მაგათის "შალკემ" უქართველოდ სძლია "ბაიერნს" - 2:0.

მიუნხენში ქართული დუელი უნდა გვენახა, მაგრამ "მიუნხენის" ქართველ მცველ მათე ღვინიანიძეს საფეხბურთო ამბებისთვის არ სცხელა - ის ლამის "ლომების" ყველაზე სკანდალურ ფეხბურთელად იქცა. მოკლედ, ღვინიანიძეს "ჰერტასთან" არ უთამაშია, ბერლინელებმა კი მორიგი მარცხი იგემეს - 1:0. წაგებაც არის და წაგებაც - ლევან კობიაშვილის გუნდი მიუნხენურმა მარცხმა პირველიდან მე-5 ადგილზე ჩამოაგდო. გერმანულმა წყაროებმა მასპინძელთა ერთადერთ გოლში ლევან კობიაშვილიც დაადანაშაულეს. ჩვენებური შესვენებაზე შეცვალეს. ალექსანდრე იაშვილის "კარლსრუე" "ფორტუნას" ეწვია და 0:1 დამარცხდა. ქართველმა კაპიტანმა 90 წუთი ითამაშა. "კარლსრუე" 13 ქულით მე-16 ადგილზეა და გავარდნის პირასაა. "შპორტალმა" კობიაშვილს 4,5 ბალი დაუწერა, ხოლო იაშვილს - 4.

ჰოლანდიაში დიდი ანგარიშით დამარცხდა გურამ კაშიას "ვიტესი". მერაბ ჟორდანიას გუნდი "გრონინგენს" ეწვია და 1:4 წააგო. როგორც სხვებმა, ქართველმა მცველმაც ცუდად ითამაშა. "ვიტესი" 17 ქულით მე-15 ადგილზეა.

ბელგრადში 12 ათასი მაყურებელი დაესწრო "ცრვენა ზვეზდასა" და "ვოივოდინას" შეხვედრას, რომელიც 2:2 დასრულდა. გიორგი მერებაშვილს თავი ამჯერად არ გამოუჩენია. ის მეორე ტაიმში შეცვალეს. "ვოივოდინა" 31 ქულით მესამეა და 3 ქულით ჩამორჩება "ცრვენა ზვეზდას".

საბერძნეთის სუპერლიგაში "ერგოტელისის" შემადგენლობაში შეუცვლელად ითამაშა გიორგი შაშიაშვილმა. კრეტელები "ირაკლისს" ესტუმრნენ და 1:1 დაუზავდნენ. "ერგოტელისს" 14 ქულა აქვს და მე-14 ადგილზეა.