საქართველოს ეროვნული ნაკრები დაახლოებით, ერთი საათის წინ, სლოვენიიდან
სამშობლოში დაბრუნდა. აეროპორტში ფეხბურთელებს ქომაგები და ჟურნალისტები
დახვდნენ, სადაც პირველი შეფასებები გაკეთდა:
გიორგი ლორია: "საკმაოდ რთული თამაში იყო. მსოფლიოს ერთ-ერთი
უძლიერეს გუნდს ვეთამაშებოდით. რაც შეეხება 11-მეტრიანს, გამიმართლა და
მეტი არაფერი, გამოვიცანი მიმართულება და მოვიგერიე ბურთი. გაშვებული გოლი
კი აუღებელი არ იყო, მაგრამ ასე გამოვიდა. გუნდმა მოახერხა თამაშში
გარდატეხის შეტანა და მოვიგეთ. არ მინერვიულია, მინდა გითხრათ, მოედანზე
მონდომებით გავედი და ღმერთმაც გადმომხედა".
ლევან კაკუბავა: "რთული თამაში იყო, სლოვენია გვიტევდა. ისინი
მსოფლიოს რეიტინგში 17-ე ადგილზე არიან. ალბათ, მონდომების ხარჯზე
გავიმარჯვეთ. მას შემდეგ, რაც გავათანაბრეთ, ისეთი თამაში წავიდა, რომ უცებ
მეორე გოლიც გავიტანეთ. მოგებით დავიწყე ჩემი კარიერა ეროვნულ ნაკრებში და
იმედია, ასე გავაგრძელებ".
მათე ვაწაძე: "რა თქმა უნდა, ძალიან რთული იყო, ამ თამაშში
გარდატეხის შეტანა და შედეგის მიღწევა, იმის გათვალისწინებით, რომ
სლოვენიას ძალიან ძლიერი გუნდი ჰყავს. 1:0-ის შემდეგ იმდენს მივაღწიეთ, რომ
გავათანაბრეთ და მოვიგეთ კიდეც ეს შეხვედრა. ამ შედეგით კმაყოფილი ვარ
მეც, მთელი გუნდიც და მთელი ქვეყანაც. მწვრთნელიც გახარებულია,
რასაკვირველია, გვითხრა, რომ თუკი ბოლომდე იბრძოლებ და არაფერს დათმობ,
შეიძლება ისეთი დონის ნაკრებს მოუგო, როგორიც სლოვენიაა".
goli.ge
|