25-წლის ქართველმა მცველმა მამუკა ლომიძემ მოლდოვურ ,,დაჩია’’-სთან 3-წლიანი კონტრაქტი გააფორმა.
გასული სეზონი ქართველმა ფეხბურთელმა სლოვაკურ ,,რუზომბეროკში’’
გაატარა, მანამდე კი ბათუმის ,,დინამო’’-ს, კიშინიოვის ,,ზიმბრუ’’-ს და
თბილისის ,,ლოკომოტივი’’-ს რიგებშიც ასპარეზობდა.
იყო საქართველოს 17, 19 და 21-წლამდელთა ნაკრების წევრიც.
მამუკა ლომიძე სწორედ ,,ზიმბრუ’’-ში ასპარეზობითაა ცნობილი მოლდოვური
ფეხბურთის სპეციალისტებისათვის, სადაც მან 3-წელი იასპარეზა, ამჯერად კი
პაუზის მერე უკვე კიშინიოვის სხვა კლუბში აღმოჩნდა, სადაც მას კიდევ ერთი
ქართველი ვასილ ღუჭაშვილი დახვდა. არის საუბრები, რომ ,,დაჩია’’ კიდევ
გაძლიერდეს ქართველებით, კერძოდ კი ,,ზესტაფონი’’-დან ლევან კორღალიძის და
დავით გამეზარდაშვილის გადაბირებაზეა საუბრები.
მოლდოვური ინტერნეტ-საიტი moldfootball.com მასთან მცირე ინტერვიუს გვთავაზობს:
-მამუკა, შეიძლება ითქვას, რომ დაბრუნდი შენს მეორე სამშობლოში?
-დიახ, რა თქმა უნდა, მე ძალიან ბედნიერი ვარ, რომ მოლდოვაში
დავბრუნდი. ერთ-ერთ ჩემს პირველ ინტერვიუში, როცა ,,ზიმბრუ’’-ში
ვთამაშობდი, განვაცხადე, რომ მოლდოვა გახდა ჩემი მეორე სამშობლო. ეს კი
ნამდვილად ასეა, აქ მე თავს ისე ვგრძნობ, როგორც საკუთარ სახლში.
მოლდოვაში ყოფნისას თავი უცხოელად არასოდეს არ მიგრძვნია.
-რატომ შეჩერდა შენი არჩევანი ,,დაჩია’’-ზე?
-პირველ რიგში მე მიმიწვიეს, როცა ჩამოვედი და ვნახე რა პირობებია
ფეხბურთელისათვის, ძალიან მომეწონა. შემდეგ მე დამაკვირდნენ და საბოლოოდ
დავრჩი კიდეც. მეორეც - ,,დაჩია’’ პერსპექტიული კლუბია, რომელიც წელს
ევროტურნირებზე იასპარეზებს, კლუბის ხელმძღვანელობას სერიოზული გეგმები
აქვთ და მეც მომინდა აქ ვყოფილიყავი.
-წინ თასის ფინალია, ვის უქომაგებ?
-(იცინის) მე ,,დაჩია’’-სთან გავაფორმე კონტრაქტი და ამ კითხვის დასმა ცოტა უხერხულია. სერიოზული შანსი გვაქვს, რომ თასი მოვიპოვოთ.
ამავე მასალის ბოლოს უკვე ირწმუნებიან რომ ლევან კორღალიძესთან
კონტრაქტის გაფორმება მოხდა, შეგახსენებთ, რომ ,,ზესტაფონში’’ ჩამოსვლამდე
ლევანი ჯაბა დვალთან ერთად სწორედ ,,დაჩია’’-შიმასპარეზობდა და კლუბის
ერთ-ერთი ლიდერიც იყო.