21 მაისს საქართველოს პროფესიული ფეხბურთის ლიგის ოფისში გაიმართა წილისყრა, რომელმაც დავით ყიფიანის სახელობის საქართველოს თასის ფინალის მონაწილეებში მასპინძლის სტატუსის მქონე გუნდი გამოარკვია. ეს სტატუსი ნომინალურია, თუმცა, გარკვეულ პრივილეგიებს ანიჭებს მის მფლობელს. კერძოდ, მასპინძლის სტატუსის მქონე გუნდი ირჩევს სათამაშო ფორმის ფერებს, გასახდელს სტადიონზე, სათადარიგოთა სკამს და ფინალის წინა დღეს მატჩის ჩატარების არენაზე ვარჯიშის დროს. წილისყრის შედეგად მასპინძლის სტატუსი თბილისის "დინამოს” მიენიჭა. შესაბამისად, პროცედურაში გამარჯვებული კლუბის ხელმძღვანელებმა წარმოადგინეს სათამაშო ფორმის ფერები. "დინამო” ფინალში ტრადიციული ლურჯ-თეთრი კომბინირებული მაისურებით, ლურჯი ტრუსებით და ლურჯი გეტრებით იასპარეზებს. ამ თვალსაზრისით, არც "ვიტ ჯორჯია” აღმოჩნდა დაჩაგრული. საქართველოს ექსჩემპიონი ასევე ტრადიციული მწვანე მაისურებით, მწვანე ტრუსებით და მწვანე გეტრებით გამოვა მოედანზე. ფინალის წინა დღეს, 25 მაისს, ბორის პაიჭაძის სახელობის ეროვნული სტადიონის მწვანე მინდორზე მატჩისწინა ვარჯიშს პირველები დინამოელები ჩაატარებენ. "დინამო” 17 საათსა და 30 წუთიდან დაიკავებს მოედანს და დაახლოებით 1 საათს ივარჯიშებს. 18 საათსა და 30 წუთიდან არენაზე უკვე „ვიტ ჯორჯია" გამოვა სავარჯიშოდ.

ამავე დღეს, 18 სათსა და 30 წუთზე ეროვნული სტადიონის საკონფერენციო დარბაზში გაიმართება წინასამატჩო პრესკონფერენცია ორივე გუნდის მთავარი მწვრთნელის მონაწილეობით. პრესკონფერენციის დასრულებისს შემდეგ ჟურნალისტებისთვის დარიგდება ფინალზე დასასწრები აკრედიტაციები.

პფლ-ს პრესსამსახური