კახა კალაძეს დებიუტი "მფრინავმა ვირებმა" ჩაუმწარეს - "ჯენოას" 13-მა ნომერმა პირველად მოირგო "მილანის" გარდა სხვა კლუბის ფორმა ბოლო 10 წელიწადში. ჩვენი ნაკრების კაპიტანი სასტარტო შემადგენლობაში იყო და მან შეუცვლელად ითამაშა. "ჯენოამ" სამი ცენტრალური მცველით ითამაშა, კალაძე მარცხენა ცენტრალური მცველი იყო. ჯამპიერო გასპერინიმ თამაშის შემდეგ მარცხზე ილაპარაკა, სხვა მიზეზებთან ერთად მან ფეხბურთელთა ფიზიკური მდგომარეობა დაასახელა, ბევრი მათგანი სანაკრებო პაუზისას გუნდთან ერთად არც იმყოფებოდა. "კალაძემ ჩვენთან მხოლოდ ორი ვარჯიში ჩაატარა", - აღნიშნა მან. იტალიურმა "დატასპორტმა" ჩვენებურის გარჯა 5 ბალით შეაფასა: "აღარ არის ის დრო, როცა კალაძეს მარტო შეეძლო "მილანის" დაცვის ცენტრის კონტროლი". სერია ბ-ში "ემპოლი" შინ 1:1 დაუზავდა "ტრიესტინას", ლევან მჭედლიძე მე-2 ტაიმის მე-11 წუთზე გამოჩნდა ფოტის ნაცვლად. ინგლისური ჩემპიონშიპში პირველად უნდა ეთამაშა სეზონში ზურაბ ხიზანიშვილს, მაგრამ "ბლექბერნიდან" "რედინგში" განათხოვრებულმა ფეხბურთელმა მონაწილეობა ვერ მიიღო "კრისტალ პალასის" რბევაში - 3:0, ხიზანიშვილი სათადარიგოთა სკამზე იჯდა. საფრანგეთის ლიგა 2-ში "ლე მანი" ქართველთა გარეშე დაუზავდა "ბულონს" - 1:1 ამირან სანაია და გიორგი მაკარიძე განაცხადშიც არ ყოფილან. ჯერჯერობით ლევან კობიაშვილის "ჰერტა" უდანაკარგოდ მიიწევს მიზნისკენ - ბუნდესლიგაში დაბრუნებისკენ, "ჰერტამ" ბერლინში 3:1 დაამარცხა "არმინია". ლევანმა 90 წუთი ითამაშა დაცვის მარცხენა ფლანგზე. არადა მატჩის წინ ქართველის თამაში მცირე ტრავმის გამო საეჭვო იყო, თუმცა მარკუს ბაბელი იმედს გამოთქვამდა, რომ კობი მაინც ითამაშებდა. ასეც მოხდა. "შპორტალმა" ჩვენებურს 3,5 ბალი დაუწერა. მათე ღვინიანიძის თამაში სტუმრად "დუისბურგის" წინააღმდეგ საეჭვო იყო და ქართველმა მცველმა ვერც ითამაშა - "დუისბურგმა" 2:1 მოუგო "მიუნხენს". ალექსანდრე იაშვილის "კარლსრუე" დღეს თამაშობს. რაც მერაბ ჟორდანია ჰოლანდიური "ვიტესის" მფლობელი გახდა, არნემულ კლუბმა ზედიზედ მესამე მატჩი წააგო, თუმცა ამჯერად დიდი ანგარიშით არა. "ვიტესი" უგებდა კიდეც სტუმრად "ჰერენვეენს", მაგრამ საბოლოოდ 1:2 დამარცხდა. გურამ კაშიას ჯერ არ აქვს "ვიტესში" თამაშის უფლება. უნგრულ შოპრონილიგაში ქართული გოლი გავიდა, "ეტომ" 3:0 გაანადგურა "დებრეცენი", რატი ალექსიძემ თავი 87-ე წუთზე გამოიჩინა. რატიმ დიდებულად ითამაშა, პირველი გოლისას შედეგიანი პასი მიითვალა, მასთან უხეშობისთვის 43-ე წუთზე ფარკაში გააძევეს და ბოლოს თავად ქართველმაც გამოიჩინა თავი (შეფასება - 7 ბალი). "დიორი ეტოს" სხვა ქართველები არ გამოჩენილან. "ეტო" 8 ქულით მე-10 ადგილზეა. ვახტანგ ფანცხავას "ვაშაშმა" 9 კაცით დაასრულა მატჩი "კაპოშვართან" - 1:2. ქართველმა ფორვარდმა მეორე ტაიმი ითამაშა. "ვაშაში" 10 ქულით მეექვსეა. დანიის მეორე დივიზიონში დავით დევდარიანის "ორჰუსმა" 7:1 გაანადგურა "ჰრიდოვრე", ამ წარმატებას საფუძველი ქართველმა ჩაუყარა (რომელმაც წინა ტურში ჰეთ თრიკი შეასრულა), მე-5 წუთზე გახსნა ანგარიში. ლატვიაში თავი გამოიჩინა "დაუგავას" ფორვარდმა მამუკა ღონღაძემ, მოლდოვაში თავი გამოიჩინა დავით გამეზარდაშვილმა, რუსეთის I დივიზიონში კი - ოთარ მარცვალაძემ. რუსულ პრემიერლიგაში მე-20 ტურის მატჩები გაიმართა. მოსკოვურ დერბიში მალხაზ ასათიანის "ლოკომოტივმა" 1:0 ცსკა-ს, რითაც ლიდერი "ზენიტი" ერთობ ახეირა. 69-ე წუთზე თამაშში ინციდენტი მოხდა ქართველი მცველისა და ჩილელი ნახევარმცველი მარკ გონსალესის მონაწილეობით. არმიელმა ძალიან იუხეშა ჩვენებურის წინააღმდეგ, ასათიანმა კი პასუხი ბურთის სახეში სროლით დაუბრუნა. ამით არ მორჩენილა ინციდენტი, გონსალესმა ოდნავ ჩაარტყა თავით ქართველს, ხოლო მალხაზმა ყელში წაუჭირა ხელი მას, კიდევ კარგი თანაგუნდელებმა დროულად მოირბინეს. მსაჯმა ორივე გასახდელში გაისტუმრა. "ჩემპიონატმა" ჩვენებურს ყველაზე ცუდი შეფასება, 5 ბალი დაუწერა. "მთავარია, რომ მოვიგეთ, ეპიზოდის კომენტირება არ მსურს, ემოციამ მძლია", - განუცხადა რუსულ ტელევიზიებს მალხაზ ასათიანმა. ყაზანის "რუბინმა" ლაშა სალუქვაძის დახმარების გარეშე 3:0 დაამარცხა "ამკარს" და ტიტულისთვის ბრძოლას განაგრძობს. მოსკოვში "სპარტაკმა" 2:1 აჯობა "სატურნს", კარპინმა ჯანო ანანიძე მეორე ტაიმი ათამაშა (6 ბალი) იბსონის ნაცვლად. ეროვნული ნაკრებიდან კლუბში დაბრუნებული ნუკრი რევიშვილი სკამზე დასვეს, მის ნაცვლად სტუმრად "როსტოვთან" "ანჟის" კარში ილია აბაევი ჩადგა. სამაგიეროდ, პირველად ითამაშა "ანჟის" სასტარტოში ოთარ ხიზანეიშვილმა, კარგადაც - მან გუნდში ერთ-ერთი საუკეთესო შეფასება მიიღო - 6 ბალი. ნალჩიკის "სპარტაკი" მოულოდნელად დამარცხდა სამარაში აუტსაიდერ "კრილია სოვეტოვთან" - 0:2. მატჩის 57-ე წუთზე დავით სირაძემ თანამემამულე გოგიტა გოგუა (ორივეს 5,5-5,5 ბალი) შეცვალა. სირაძეს ორი მომენტი შეექმნა, ჯერ ბურთი ოდნავ ააცილა მასპინძელთა კარს, მატჩის დასრულებამდე 2 წუთით ადრე კი ვარდნაში დაარტყა, მაგრამ მეკარემ აუღო. გოგუა კი, სანამ შეცლიდნენ, ჩვეულ სტილში აქტიურობდა. 20 ტურის გასვლის შემდეგ ქართველ ფეხბურთელთა გუნდებიდან საქმე უკეთ სალუქვაძის "რუბინს" აქვს - 40 ქულით მე-2 ადგილზეა. ნალჩიკის "სპარტაკი" 33 ქულით მე-4 ადგილზეა, "სპარტაკი" 29 ქულით მე-6-ეზეა, "ლოკომოტივი" 26-ით - მერვეზე. "ანჟის" 23 ქულა აქვს მე-11 ადგილზეა. "ლელო"