დავით კვირკველიამ რუსეთის პრემიერლიგაში ბოლოს მე-15 ტურში გამოჩნდა. თუმცა ეს ჯერ კიდევ მახაჩყალის "ანჟიში" გამოსვლის პერიოდში მოხდა, სადაც ყაზანის "რუბინმა" არენდით გაუშვა - 30 ივლისს ქართველმა ფეხბურთელმა რამენსკოეში "სატურნის" წინააღმდეგ ითამაშა.

მას შემდეგ კვირკველიასთვის ბევრი რამ შეიცვალა - არენდის ვადა დაუსრულდა და ზაფხულში რუსულმა ინტერნეტსააგენტოებმა გაავრცელეს ინფორმაცია, რომლის თანახმადაც 30 წლის ქართველი პრემიერლიგის დებიუტანტ ნოვოსიბირსკის "სიბირმა" ევროპის ლიგისთვის დაიმატა. ციმბირელთა კლუბი გასულ სეზონში რუსეთის თასის ფინალში გავიდა და ევროპის ლიგაში მონაწილეობის უფლება ამგვარად მიიღო. პირველი ლიგიდან ევროპის ლიგამდე მოულოდნელი ნახტომის გამო კი კლუბს სასწრაფოდ გაძლიერება დასჭირდა.

თუმცა ცნობის გავრცელებიდან ერთ კვირაში კვირკველია "რუბინმა" ჩემპიონთა ლიგის განაცხადში შეიყვანა. მაშინ ეს საკითხი პასუხგაუცემელი დარჩა - რა მოხდა კვირკველიას თავს? ის მალტა-ლატვიასთან სათამაშო ნაკრებში გამოიძახეს და გავარკვიეთ, რომ მისი "სიბირში" გასვლის შესახებ გავრცელებული ინფორმაცია ტყუილი ყოფილა. ნოვოსიბირსკელებს კვირკველიას დამატება მართლა სურდათ, მაგრამ ყაზანელებმა მახაჩყალის "ანჟიდან" გასაციმბირებლად არ დაუბრუნებიათ. თუმცა უკვე 23-ე ტური მიილია და დათოს ერთი წუთიც არ უთამაშია. სამწუხაროდ, უთამაშებლობა ლატვიასთან შეხვედრაში ეტყობოდა კიდეც - ყოველთვის აქტიური და სასარგებლო ფეხბურთელი თემურ ქეცბაიამ პირველი ტაიმის შემდეგ შეცვალა.

თუმცა ყაზანელები კვირკველიას არ ათამაშებენ და რთული მისახვედრი არ არის, რომ სეზონის დასასრულს დათოს კლუბის შეცვლა მოუწევს. თუმცა ჯერ უცნობია, კარიერას სად გაგრძელებს.

მერაბ მამულაშვილი