მაჰაჩყალის "ანჟის" უკვე ყოფილი მთავარი მწვრთნელი, ქართველი ომარ თეთრაძე ქვემოთ მოცემულ მცირე ინტერვიუში გუნდიდან წასვლის მიზეზებზე საუბრობს და აქვე აღნიშნავს, რომ რუსული პრემიერლიგის დაღესტნურ წარმომადგენელს გაჯი გაჯიევი ჩაიბარებს.
"გუშინ დილით ბიჭებს დავემშვიდობე. ყველა მათგანს თბილად დავშორდი და გაწეული სამუშაოსთვის მადლობა გადავუხადე. საღამოს კი კლუბის პრეზიდენტს შევხვდი და ჩემი გადაწყვეტილების შესახებ ვაცნობე. მან გამიგო და წასვლის ნება დამრთო. დღეს მოსკოვში მივემგზავრები, იქიდან კი თბილისში, ოჯახთან გაფრენას ვაპირებ".
"რატომ წავედი? ნუთუ ასე ძნელია ამის დაჯერება, დავიღალე. დავიღალე მუდმივი შეკრებებით, მატჩებით, დაძაბულობით. მეუღლეს და შვილს ფაქტობრივად ვერ ვხედავ, ასე ცხოვრება კი ძალიან რთულია. რაც შეეხება იმას, რატომ მაინცდამაინც ეხლა, გეტყვით, რომ რუსეთში სატრანსფერო ფანჯარა 8 აპრილს იხურება, რაც იმას ნიშნავს, რომ ახალ მწვრთნელს გუნდის დაკომპექტებისთვის კიდევ საკმაო დრო ექნება. პრემიერლიგის დაწყებამდე კი იმიტომ არ წავედი, რომ უბრალოდ მსურდა, ჩემი შრომის ნაყოფი დამენახა და "ანჟისთვის" უმაღლეს დივიზიონში მეხელმძღვანელა. ცუდია, რომ ვერ მოვიგეთ, მაგრამ სადებიუტო მატჩისთვის არც ფრე გახლდათ ურიგო შედეგი".
"ანჟის" გაჯი გაჯიევი ჩაიბარებს. ის უკვე მოემგზავრება დუბაიდან. ყველაფერი გადაწყვეტილია მას და მთელ გუნდს წარმატებას სულით და გულით ვუსურვებ", - ამბობს ქართველი სპეციალისტი.