გიორგი მერებაშვილი: "სერბეთის და საქართველოს ჩემპიონატები ძალიან განსხვავდება" - 23 აპრილში 2010

სერბეთის ჩემპიონატში მოასპარეზე ვოივოდინას ფეხბურთელ გიორგი მერებაშვილს დღეს სერბეთში დავუკავშირდით და კლუბსა და ეროვნულ ნაკრებს შეეხო საუბარი. ქვემოთ გაეცნობით საქართველოს ეროვნული ნაკრებისა და ვოივოდინას ფეხბურთელ გიორგი მერებაშვილთან ინტერვიუს.

იმედი მაქვს, რომ ნაკრები დიდ წარმატებებს მიაღწევს და გავახარებთ ქართველ გულშემატკივარს.

გიორგი თავდაპირველად კლუბში არსებულ მდგომარეობაზე ვისაუბროთ, რამდენიმე დღის წინ ვოივოდინამ სერბეთის ნახევარ ფინალში პარტიზანი დაამარცხა და ფინალში გააღწია, რა კომენტარს გააკეთებ ამასთან დაკავშირებით?

კომენტარი არ ჭირდება, რომ პარტიზანი სერბეთის ჩემპიონატში ცრვენა ზვეზდასთან ერთად ლიდერია და ყოველთვის სასიხარულოა პარტიზანის დამარცხება თასის ნახევარფინალში, თან მისსავე მოედანზე. გუნდში კარგი განწყობაა და ყველანაირად ვეცდებით, რომ თასი ავიღოთ.

კლუბი მიმდინარე სეზონში რა მიზანს ისახავს?

როცა გუნდში მოვედი, თავიდანვე მითხრეს, რომ თასის აღებას ვგეგმავთო, კლუბს თავისი ისტორიის განმავლობაში არც ერთხელ არ მოუგია თასი და გვინდა, რომ პირველად დავეუფლოდ თასს ვოივოდინას ისტორიაში.

საინტერესოა შენი აზრი, რამდენად განსხვავდება საქართველოსა და სერბეთის ჩემპიონატები ერთმანეთისგან?

ძალიან განსხვავდება.

კერძოდ?

სისწრაფით და ბრძოლისუნარიანობით, თუმცა ძალიან მოიკოჭლებენ ტექნიკით, თუ არ ჩავთვლით პარტიზანსა და ცრვენა ზვეზდას.

გიორგი მოდი ეროვნულ ნაკრებსაც შევეხოთ, თემურ ქეცბაიასთან მუშაობა რამდენად მომგებიანია შენთვის და შენი მომავალი ხედვა როგორია ნაკრებისა?

მე მახსოვს თემურ თამაშები და ყოველთვის მომწონდა თუ როგორ იხარჯებოდა მინდორზე, რომ გუნდისთვის სარგებელი მოეტანა, როგორც მწვრთნელი ძალიან წარმატებულია და ვარჯიშებზე ბოლომდე იხარჯება. იმედი მაქვს, რომ ნაკრები დიდ წარმატებებს მიაღწევს და გავახარებთ ქართველ გულშემატკივარს.

როგორც ცნობილი გახდა, საქართველოს ეროვნული ნაკრები ავსტრიაში კამერუნის ეროვნულ ნაკრებს შეხვდება, შენი კომენტარი ამ მატჩთან დაკავშირებით როგორი იქნება?

ძალიან კარგი იქნება მართლაც და ნაკრები რაც უფრო მეტ ამხანაგურ შეხვედრებს ჩაატარებს მით უფრო კარგი იქნება. მეტოქეს რაც შეეხება, ძალიან ძლიერი მეტოქე გვყავს.

დიდი მადლობა გიორგი და წარმატებები შენს პირად კარიერაში.

შეგახსნებეთ, რომ გიორგი მერებაშვილის გუნდი, სერბეთის ჩემპიონატის გათამაშებაში მეხუთე ადგილზე იმყოფება და 37 ქულა გააჩნია.