საქართველოს დავით ყიფიანის სახელობის თასის ფინალის მეორე დღეს, ‘დინამომ’ მაკედონიელ მცველ - ალექსანდრე კრსტესკისთან კონტრაქტი ოფიციალურად გაწყვიტა.  ფეხბურთელმა გუნდში მხოლოდ 6 თვე ითამაშა, თუმცა, მას ორწლიანი კონტრაქტი ჰქონდა გაფორმებული.

როგორც ალექსანდრე ჩვენთან საუბარში ამბობს, მისთვის გუნდიდან გაშვების მიზეზი უცნობია.

- "დინამოსთან კონტრაქტი კიდევ მქონდა, მაგრამ პირობების თანახმად მათ შეეძლოთ ჩემთან კონტრაქტის გაწყვეტა, თუ მათ ამის სურვილი ექნებოდათ.  ფეხბურთია და ყველაფერი ხდება.

-‘დინამოს’  მწვრთნელს არ მოსწონდით თუ ხელმძღვანელობას?

-  არ ვიცი ეს მე. უმჯობესი იქნება თუ ბუბას (ტყავაძე, ‘დინამოს’ მმართველი დირექტორი) ან კახას  (კაჭარავა, ‘დინამოს’ მთავარი მწვრთნელი) ჰკითხავთ. მე ყოველთვის პროფესიონალი ვიყავი, ‘დინამოშიც’, თბილისშიც და პროფესიონალი ვიქნები მუდამ.

- ამბობენ, რომ ‘დინამოში’ ფინანსური კრიზისია და სწორედ ამის გამო გაგიშვეს გუნდიდან, შენ როგორ ფიქრობ, ეს იყო შენი გაშვების მიზეზი?

- ვფიქრობ, რომ სწორედ ასეა. გუნდში ფინანსური კრიზისია და სწორედ ამიტომ გამიშვეს, ჩემი აზრით, იმიტომ, რომ ჩემს გარდა სხვა ბევრი ფეხბურთელიც წავიდა.

-  რომელ ფეხბურთელს გამოარჩევ ‘დინამოდან’?

- ‘დინამოს’ ბევრი ტალანტი ჰყავს, მაგრამ საუკეთესო კაპიტანი - გურამ კაშია იყო. სხვებიც არიან, მაგრამ ისინი ძალიან ახალგაზრდები არიან.

- საქართველოს ჩემპიონატზე რა აზრის ხარ?

-  ვფიქრობ, რომ კარგი ჩემპიონატია, იმიტომ, რომ არიან ისეთი გუნდები, რომლებსაც  შეუძლიათ ბრძოლა და მოგება . ყველაზე რთული და არეულია, სატურნირო ცხრილის თვალსაზრისით,  საქართველოს ჩემპიონატი.

-  ყველაზე რთულ მეტოქედ ვის დაასახელებთ და რომელ თამაშს?

-  რა თქმა უნდა, ‘ვიტ ჯორჯია’ , იმიტომ რომ, მხოლოდ ‘ვიტ ჯორჯიას’ შეუძლია მოიგოს ორივე ტაიმი. 

- ფეხბურთელებთან და ხელმძღვანელობასთან როგორი ურთიერთობა გქონდა? მწვრთნელით კმაყოფილი იყავით?

-  მე კარგი უერთიერთობა მაქვს დირექტორთანაც, მწვრთნელებთანაც და ფეხბურთელებთანაც. რაც შეეხება კახას, როგორ გითხრათ, ის მუშაობდა ‘OK’, ასე ვიტყოდი.

- შემოთავაზების შემთხვევაში, უკან დაბრუნდებოდით საქართველოში?

- თუ დამირეკავენ და კარგ ფულსაც შემომთავაზებენ, რატომაც არა, - მე დავბრუნდები!

- ‘დინამოს’ შანსებს როგორ აფასებ ევროტურნირზე?

- ვფიქრობ, ცუდი. იმიტომ, რომ მათ არ ჰყავთ ფეხბურთელები. ჰყავთ ტალანტები, მაგრამ ისინი ჯერ პატარები არიან, ევროპისთვის კი გამოცდილი ფეხბურთელები სჭირდებათ.

-  ეს ტალანტები ვინ არიან?

- კაკუბავა, რობერტინიო, ლექვთაძე, ჩიორა (თექთუმანიძე).

მაგდა კლდიაშვილი