CiDA-ში, ინტეგრაციის ახალგაზრდული კლუბის ფარგლებში, ექსპერტებთან შეხვედრები გრძელდება. 8 მაისს, კლუბის წევრი ახალგაზრდები სპორტულ ჟურნალისტს დავით ქლიბაძეს შეხვდნენ.

შეხვედრა, ტრადიციულად, სტუმრის მონოლოგით დაიწყო და დისკუსიის რეჟიმში გაგრძელდა. ცნობილმა სპორტულმა კომენტატორმა ახალგაზრდებთან ფეხბურთის ისტორიასა და მნიშვნელობაზე, ცნობილ გუნდებსა და ფეხბურთელებზე ისაუბრა. საუბარში მან აქცენტი ქართულ ფეხბურთზე გააკეთა, ამ სფეროში დღეს არსებული პრობლემები მიმოიხილა და ქალთა და ბავშვთა ფეხბურთსაც შეეხო.

"მე შევეცადე, ზოგადად, ფეხბურთზე და ამ სპორტის მნიშვნელობაზე მელაპარაკა. ჩვენ ვისუბრეთ საქართველოს ნაკრების შესახებ და მე ახალგაზრდებს ვთხოვე, რომ ობიექტურად შეხედონ ჩვენს დღევანდელ საფეხბურთო რესურსებს. უდიდესი  შრომა, ენერგია და მოთმინება გვჭირდება იმისთვის, რომ საქართველოს ნაკრები, რომელიც არის ქართული ფეხბურთის პოტენციალის გამომხატველი, მივიდეს იმ დონემდე, ჩვენ რომ გვინდა”, განაცხადა დავით ქლიბაძემ.

ექსპერტებთან შეხვედრები ინტეგრაციის ახალგაზრდული კლუბის საქმიანობის ერთ-ერთი მიმართულებაა. ამ აქტივობის ფარგლებში, კლუბის წევრი ახალგაზრდები სხვადასხვა დარგის პროფესიონალებს იწვევენ და მათთან დისკუსიას მართავენ.

"ბევრი ისეთი რამ გავიგე ფეხბურთის შესახებ, რაც მანამდე არ ვიცოდი. ბატონმა დავითმა ფეხბურთთან დაკავშირებული კარგი ისტორიები მოგვიყვა და ჩვენს კითხვებსაც საინტერესო პასუხები გასცა. საერთო ჯამში, საინტერესო შეხვედრა გამოვიდა, კმაყოფილი ვარ”, აღნიშნა ინტეგრაციის ახალგაზრდული კლუბის წევრმა, 16 წლის გიორგი ხევსურიანმა.

ინტეგრაციის ახალგაზრდული კლუბი "რუსთავის არაფორმალური განათლების ცენტრის” ერთ-ერთი მიმართულებაა.

"რუსთავის არაფორმალური განათლების ცენტრი” დაფუძნებულია CiDA-ს მიერ პროექტის "იძულებით გადაადგილებული პირების სოციო-ეკონომიკური ინტეგრაციის ხელშეწყობა ქვემო ქართლის რეგიონში” ფარგლებში.

პროექტი დაფინანსებულია ევროკომისიის (EC) მიერ.