შესაძლოა, თბილისის ''დინამოში'' მალე ძალიან საინტერესო ფეხბურთელი ვიხილოთ. უკვე თბილისშია და კლუბთან ერთად ვარჯიშობს ახალი ზელანდიის ეროვნული ნაკრების ნახევარმცველი კრის ჯეიმსი. 
 ალბათ, ეს სახელი და გვარი უცხოური ფეხბურთის მოყვარულებს ეცნობათ კიდეც. ჯეიმსმა 2009 წლის კონფედერაციის თასზე All Whites-ის ღირსება 2-ჯერ დაიცვა, ორივე ჯერზე შეცვლაზე ესპანეთთან და მასპიძნელ სამხრეთ აფრიკასთან შეხვედრებში.
 22 წლის ნახევარმცველი ბოლოს ფინეთის ერთ-ერთ საუკეთესო კლუბ ''ტამპერე იუნაიტედში'' ასპარეზობდა და საკმაო წარმატებითაც. 
 მისთვის უცხო არც ევროტურნირებია. 2008 წელს, ფინური კლუბის რიგებში ჩემპიონთა ლიგის პირველ და მეორე საკვალიფიკაციო ეტაპებზე 4 მატჩში 2 გოლი გაიტანა, ჩერნოგორიულ ''ბოდოჩნოსტთან'' და სლოვაკურ ''არტმედიასთან''. ფინეთში გადასვლამდე, ჯეიმსი ლონდონის ''ფულჰემის'' სარეზერვო გუნდში ირიცხებოდა.
 ჩვენის მხრივ იმედს ვიტოვებთ, რომ ზელანდიელი პოტენციური ახალწვეული ''დინამოს'' მოთხოვნებს დააკმაყოფილებს და კონტრაქტსაც დაიმსახურებს. შეგახსენებთ, ახალი ზელანდიის ნაკრების 2010 წლის მსოფლიო ჩემპიონატის მონაწილეა და ვინ იცის, იქნებ პირველად ქართული ფეხბურთის ისტორიაში, მუნდიალზე საქართველოს ჩემპიონატის ფეხბურთელის თამაშის ხილვის შესაძლებლობა მოგვეცეს.


გიორგი ჯავახაძე   www.goli.ge